पोखराको सूर्योदर्शन सहकारी संस्थाको बचतकर्ताले सहकारीमा बचत गरेको रकम हिनामिना गर्नेहरुमाथी अभियोग पत्र दायर भएर अदालतमा थुनछेक बहस चलिरहेको छ । सूयोदर्शन सहकारीको रकम अपचलनमा गोर्खा मिडिया नेटवर्कका सञ्चालनक गितेन्द्रबाबु राई (जिबी) देखि, पूर्व गृहमन्त्री तथा राष्ट्रिय स्वतन्त्र पार्टी रास्वपाका सभापति रवि लामिछाने, पूर्वडिआईजी छविलाल जोशीसहित ५१ जनाविरुद्ध मुद्धा लगाइएको छ ।
मुद्दा लगाइएका ५१ जनामा नेपालका मूख्य ठूला दलका नेताहरुलाई मूख्य दोषी देखिएका छन् । सूर्योदर्शन सहकारी ठगी प्रकरणमा काँग्रेस, एमाले, माओबादी, रास्पवा लगायतका मूख्य दलका नेताहरु नै दोषी देखिएका हुन् । आउनुहोस् कुनकुन दलका नेताहरु सूर्योदर्शन सहकारी ठगी प्रकरणमा मुछिएका छन् चर्चा गरौँ ।
राष्ट्रिय स्वतन्त्र पार्टी रास्वपाका सभापति रवि लामिछाने
प्रहरीको छानबिनले सहकारीबाट रविले ३ करोड ३७ लाख ६५ हजार रुपैयाँ अपचलन गरेको निष्कर्ष निकालेको छ । रविले बचतकर्तालाई हानि–नोक्सानी र आफू तथा कम्पनीलाई फाइदा हुनेगरी सहकारीको बचतकर्ताको रकम उक्त सहकारीका अध्यक्ष जीबी राई समेतसँग मिलेमतो गरी सहकारीको ऐन, नियम, विनियमविपरीतको कार्य गरेको ठहर छ ।
व्यक्तिगत ऋण एक करोड, स्वीट सेयरका लागि ७५ लाख र गोर्खा मिडिया नेटवर्क प्राइभेट लिमिटेडको खातामा गएको रकमको सञ्चालकको हैसियतले १ करोड ६२ लाख ६५ हजार रुपैयाँ अपचलन गरेको आरोप रविमाथि लगाइएको छ। छ ।
नेकपा एमालेबाट ढोरपाटनमा निर्वाचित मेयर देवकुमार नेपाली
बचतकर्तालाई विभिन्न प्रलोभन देखाई निजी व्यवसाय र घरजग्गामा लगानी गरी बचत रकमसमेत हिनामिना गरेको आरोप बागलुङ ढोरपाटनका मेयर देवकुमार नेपालीमाथी छ । उनले अपराध गर्दा हिसाबकिताबमा बराबर बनाउन नसकेपछि देवकुमारले सूर्यदर्शन सहकारी छोडी इमेज बचत तथा ऋण सहकारी संस्था खोली आफैं अध्यक्ष भई सञ्चालक समितिमा आफू अनुकूल व्यक्ति राखेका थिए ।
एमाले नेता तथा पूर्वसांसद मीना गुरुङ
गण्डकी प्रदेशसभाकी पूर्वसांसद मीना गुरुङ २०६५ देखि २०६८ सम्म सूर्यदर्शन सहकारीकी सञ्चालक समिति सदस्य थिइन् । उनी रहेको समितिले दुई पटक गरी ५३ लाख ७६ हजार ३०८ रुपैयाँ र २६ लाख ७७ लाख ४०१ रुपैयाँ अपचलन गरेको प्रहरीले निष्कर्ष निकालेको छ ।
युवा संघका नेता शिवबहादुर गुरुङ तथा महेन्द्र भोटे
नेकपा एमाले समर्थित युवा संघ नेपालका केन्द्रीय उपमहासचिव शिवबहादुर गुरुङले सूर्यदर्शन सहकारीबाट १७ करोड ८ लाख ५ हजार २४९ रुपैयाँ दायित्व बहन गर्नुपर्ने प्रहरीको प्रतिवेदनमा देखिएको छ । उनले सूर्यदर्शन सहकारीमा २०७३ देखि २०७८ सम्म सञ्चालक समितिको सदस्यको रुपमा काम गरेका थिए । सोही समयमा उनले सहकारीबाट पैसा लगी विभिन्न ठाउँमा घरजग्गा खरिद गरेको प्रतिवेदनमा उल्लेख छ ।
माओवादी केन्द्रका नेता दीपेश पुन
पूर्वउपराष्ट्रपति नन्दबहादुर पुनका छोरा दीपेश माओवादीका युवा नेता तथा अखिल क्रान्तिकारीका महासचिव हुन् । उनले भूपेन्द्र राई तथा जीबी राईसँगको मिलेमतोमा सङ्गठित रूपमा परिचालन गर्न समूह बनाई सहकारीमा सङ्कलन भएको बचत रकम हिनामिना गरेको देखिएको छ ।
उनीमाथी एक करोड १० लाख ७१ हजार १०३ रुपैयाँ व्यक्तिगत रूपमा अपचलन गरेको र एक करोड ३ लाख ३७ हजार ७३९ रुपैयाँ सूयोदर्शन सहकारीबाट स्वर्ण लक्ष्मी बहुउद्देश्यीय सहकारीमा ट्रान्सफर गरेको प्रहरी प्रतिवेदनले देखाएको छ ।
माओवादी केन्द्रबाट लिखु तामाकोशी गाउँपालिका ७ मा निर्वाचित वडाध्यक्ष कैलाश दर्लामी
रामेछापको लिखु तामाकोशी गाउँपालिका–७ मा माओवादीबाट निर्वाचित वडाध्यक्ष कैलाशकुमार दर्लामी पनि सहकारी ठगीमा संलग्न भेटिएका छन् । उनले पदको दुरुपयोग गरी जीबी राईको कम्पनीमार्फत सहकारीको बचत रकम अपचलन गरी रकमान्तर गरी आफूले समेत आर्थिक लाभ लिएको भेटिएको प्रहरी प्रतिवेदनमा उल्लेख छ ।
उनले २०७८ सालमा सहकारीको उपाध्यक्ष पदबाट राजीनामा दिएको भनिएका उनी त्यसपछि पनि बैठकमा सहभागी भएका थिए ।
कांग्रेस नेता ज्ञानबहादुर बम्जन
ओखलढुंगा घर भई पछिल्लो समय सिन्धुलीमा बसाइ सरेका ज्ञानबहादुर बम्जन नेपाली कांग्रेसका जिल्लास्तरका नेता हुन् । उनीविरुद्ध सूर्यदर्शन सहकारीको पनि अध्यक्ष भएर बचत अपचलनमा संलग्न रहेकाले मुद्दा दायर भएको छ ।
कांग्रेस नेता विशाल तामाङ
सूर्यदर्शन सहकारी मुद्दामा सिन्धुलीका नेपाली कांग्रेसका नेता विशाल तामाङविरुद्ध पनि जीबी राईको संगठित समूहमा रहेर सूर्यदर्शन सहकारीको बचत अपचलन गरेको आरोपमा मुद्दा दर्ता भएको छ । उनले सहकारीको रकम अपचलन गरी कम्पनीको शेयर लिएको, घरजग्गामा लगानी गरेको र जीबी राईको व्यक्तिगत खातामा रकम जम्मा गर्ने गरेको प्रहरी प्रतिवेदनमा उल्लेख गरिएको छ ।
उनले सूर्यदर्शनसहित सानोपाइला सहकारी सञ्चालनमा ल्याई सहकारीको पैसा गोर्खा मिडिया नेटवर्क प्राइभेट लिमिटेडमा अवैध रुपमा २७ लाख ६८ हजार ३३३ र २ करोड ६० लाख ५७ हजार रुपैयाँ जीबी ग्रुप अफ कम्पनीज प्रालिमा लगेका थिए ।
