निमेष श्रेष्ठको निर्देशनमा फिल्म ‘लाइफ ड्यामेज’को औपचारिक घोषणा भएको छ । शुक्रबार कमलादीस्थित गणेश मन्दिरमा पूजा गर्दै निर्माणपक्षले फिल्मको मुहूर्त गरेको हो ।
यो फिल्मको मुख्य भूमिकामा नायिका सुरक्षा छिन् । त्यस्तै, यो फिल्ममा सुरक्षाको अपोजिटमा कन्टेन्ट क्रिएटरको रुपमा परिचित निर्देशक श्रेष्ठ आँफै मुख्य भूमिकामा अभिनय गर्दैछन् ।
‘फेन्टासी कमेडी ड्रामा’ जनरामा निर्माण गरिने यो फिल्मले अर्काको जुत्तामा उभिंदा वा अरूको जीवन बाँच्दा हुने अनुभव कस्तो हुन्छ भन्ने कथा बोल्नेछ ।
फिल्मको शुभ- मुहूर्त कार्यक्रममा फिल्मकी मुख्य पात्र सुरक्षा र निमेशसहित कलाकार र प्राविधिक टोलीको उपस्थित थियो । यो फिल्म निमेषको डेब्यु हो ।
यसै वर्ष रिलिज गर्ने तयारी गरेको यो फिल्मको कथा निमेष र ईशाले लेखेका हुन् । यो चलचित्रमा ईशा थापा, सञ्जना महर्जन, अमोघ अर्याल, अनिषजंग थापा, अजय पन्त, निरू खड्का लगायतको अभिनय रहनेछ ।
फन रिभोलुसन इन्टरटेनमेन्टको ब्यानरमा निर्माण हुन लागेको यो फिल्ममा प्रवीण खड्काको छायांकन, नीमा श्रेष्ठको सम्पादन, अभिषेक खरेलको प्रोडक्सन डिजाइन, आयुष महर्जनको कला निर्देशन रहनेछ ।
