हाँस्य कलाकार सागर लम्साल विवाह बन्धनमा बाँधिएका छन् । आइतबार झापाकी स्नेहा दंगालसँग उनले लगनगाँठो कसेका हुन् । उनिहरुले चाबहिलको एक पार्टी प्यालेसमा विवाह समारोह गरेका हुन् ।
पेशाले नर्स रहेकी स्नेहासँग सागरको मागी विवाह भएको हो । चर्चित हाँस्य टेलिसिरियल ‘भद्रगोल’ र ‘सक्किगोनि’मा निर्वाह गरेको ‘बले’ चरित्रले चर्चामा आएका सागरले फिल्ममा समेत अभिनय गरेका छन् ।
निर्माता छवि ओझाको ‘लोफर’बाट फिल्ममा ब्रेक पाएका उनले ‘लज्जा’ र ‘हैरान’ फिल्ममा पनि अभिनय गरेका छन् । तर, करिब ५ वर्षदेखि उनी कुनै फिल्ममा देखिएका छैनन् । बरु यो बीचमा उनले सयौं म्यूजिक भिडियोमा काम गरिसकेका छन् ।
अब सागर ‘सक्किगोनि’ समूहकै फिल्म ‘लाज शरणम्’मा मुख्य भूमिकामा देखिँदैछन् । आगामी फागुन १४ गते (महाशिवरात्री)लाई फिल्मको प्रदर्शन मिति समेत घोषणा भइसकेको छ । यो फिल्मपछि ‘बले’ आफैं फिल्म निर्माण गर्ने योजना छन् ।
