काठमाडौँ । झापाको झापा गाउँपालिका वडा नम्बर–६ स्थित पुष्पाञ्जली टोल बस्ने वर्ष ८३ की फुलमाया मुर्मु शनिवार साँझ मृत भेटिइन् । साग केलाइरहेको अवस्थामा घरमा प्रवेश गरेका दुई जना युवाले उनको हत्या गरेको प्रहरीको अनुसन्धान निष्कर्ष छ ।
हत्यामा संलग्न आरोपमा झापा गाउँपालिका–७ घर भएका २८ वर्षीय अजय यादव र २४ वर्षीय अशोक यादवलाई प्रहरीले पक्राउ गरेको छ । लुट्ने योजनाको पोल खुल्ने डरले उनीहरूले मुर्मुको हत्या गरेको जिल्ला प्रहरी कार्यालय झापाका डीएसपी कृष्ण चन्दले बताए ।
आरोपीहरू मुर्मुको घरमा जान्छन् । लकर फुटाउन खोज्दा लकर नफुटेपछि उनीहरूले दराज फुटाउँछन् । लकरमा १ लाख ४१ हजार नगद थियो । घरमा प्रवेश गरेको लकर फुटाउन लाग्दा मुर्मुले देखेपछि आरोपीहरूले कलको ह्यान्डल र फरुवाले उनीमाथि प्रहार गरेका हुन् ।
कलको ह्यान्डलले टाउकोमा प्रहार गरेर हत्या गरेपछि मुर्मुको शव परालले छोपेर उनीहरूले दुईवटा मोबाइल र गहना लुटेर भागेको डीएसपी चन्दले जानकारी दिए । घटनास्थलबाट लुटेको एउटा मोबाइल प्रहरीले बरामद गरेको छ । मुर्मुको चिउँडो र टाउकोमा प्रहार गरेर उनीहरूले हत्या गरेका हुन् ।
