काठमाडौंबाट लामो दुरीमा चल्ने सवारीसाधनहरु सतप्रतिशत नै नयाँ बसपार्क गंगबुमा थन्किएका छन् । काठमाडौं छिर्ने एकमात्र मुल नाका नागढुंगा तल गएको पहिरोले पूर्ण रुपमा बाटो रोकिएपछि सवारीहरु बसपार्कमा नै थन्किएका हुन् ।
पहिरोभन्दा उता हज्जारौंको संख्यामा सवारी जाममा परेका छन् । यसले छोटो समयमा काठमाडौंमा काम सकेर घर फर्किन आएका यात्रुहरुको अवस्था तहस–नहस भएको छ । बसपार्कमा खान र बस्न नै नसक्ने अवस्थाका धेरै यात्रुहरु देखिए । गोप्यताको ख्याल गर्दै हामीले उनीहरुको दृष्य र आवाज देखाएका छैनौं । तर कतिपय बसपार्कका पेटीमा नै रात विताइरहेका भेटिएका छन् ।
बस नचलेपछि गाडी स्टाफहरु समेत दशैंको मुखमा भौतारिएका छन् । ठूलो आर्थिक नोक्सानी परेका कारण सवारी धनीहरुपनि आत्तिएका छन् । काठमाडौं उपत्यका ट्राफिक प्रहरीका प्रमुख (प्रहरी नायव महानिरीक्षक भरत बहादुर बोहराका अनुसार आज अवरुद्ध नागढुंगा सडक खण्ड ब्रेक थ्रु हुँदैछ । यही समय त भन्न सकिन्न, तर आजबाट सवारी सञ्चालन हुनेगरी नागढुंगाको पहिरो पन्छाइ सकिन्छ उनले भने । यहाँ बाटो खुलेपनि सहज रुपमा सवारी चल्न अझै केही दिन लाग्छ ।
ठूलो सवारी जाम रहेका कारण यसलाई व्यवस्थापन गर्न र छिचोल्न लामो समय नै लाग्ने उनले बताए । एक हप्तासम्ममा बीपी राजमार्गपनि खुल्न सक्ने उनले आँकलन गरे । त्यतापनि काम भइरहेको छ, तर केही समय लाग्ने देखिन्छ उनले भने ।
दशैं अघि सवारीहरु काठमाडौंबाट बाहिरीन पाउने आशामा अहिले टिकट बुकिङ भइरहेको छ । व्यवसायीहरुलेपनि टिकट वितरण गरिरहेका छन् । यात्रुहरुलेपनि धमाधम टिकट लिइरहेका छन् ।
