काठमाडौं : राष्ट्रिय स्वतन्त्र पार्टीका सभापति रवि लामिछानेलाई प्रहरीले पक्राउ गरेको छ। सूर्यदर्शन सहकारीको रकम अपचलनमा संलग्न आरोपमा अनुसन्धान गर्न कास्की जिल्ला अदालतले प्रहरीलाई अनुमति दिएसँगै लामिछानेलाई रास्वपा पार्टी कार्यालय बनस्थलीबाट पक्राउ गरिएको हो।
सूर्यदर्शन सहकारीको संस्थापक अध्यक्ष जीबी राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दा जिल्ला प्रहरी कार्यालय कास्कीले अनुसन्धान गरिरहेको छ।
पक्राउ पर्नुअघि पार्टी कार्यालयमा कार्यकर्ता र सञ्चारकमीसँग प्रतिक्रिया दिँदै लामिछानेले आफूले कुनै अपराध नगर्दा पनि राजनीतिक प्रतिशोध साध्न खोजिएको बताए। उनले न्यायिक प्रक्रियामा सघाउने प्रतिवद्धतासमेत जनाए। राजनीतिक पूर्वाग्रहविरुद्ध खुलेर लड्न उनको भनाइ थियो।आफ्नो सम्बोधनपछि रविले पार्टी कार्यालयमा रहेको घन्टी बजाएर प्रहरीसमक्ष आफूलाई समर्पण गरेका थिए। पक्राउपछि उनका कार्यकर्ताले सरकारविरुद्ध नाराबाजी गरेका थिए। पूर्वडीआइजी छविलाल जोशी, राई र लामिछानेले सञ्चालन गरेको गोर्खा मिडिया नेटवर्क विभिन्न सहकारीबाट ६५ करोड ५४ लाख अवैध तरिकाले आएको सूर्य थापा नेतृत्वको संसदीय छानबिन समितिको निष्कर्ष छ।
शुक्रबार पक्राउ परेका लामिछानेलाई अहिले कास्की प्रहरीले पोखरा लगिरहेको छ । आज राति पोखरा पुर्याएर आइतबार कास्की जिल्ला अदालतमा उपस्थित गराउने प्रहरीको तयारी छ । सभापति लामिछानेलाई शुक्रबार पक्राउ गर्दा हवाई मार्ग मार्फत कास्की लग्ने प्रहरीले तयारी गरेको थियो। तर सभापति रवि र रास्वपाका केही नेताहरूले हवाई मार्ग नभएर सडकमार्ग मार्फत नै जाने भनेपछि प्रहरी सहमत भएको हो ।
