फिल्म ‘माइली’ को सोमबार काठमाडौंको भद्रकाली मन्दिरमा मुहुर्त गरिएको छ । बाबु साहेब बलामीको कन्सेप्ट र निर्देशन रहेको फिल्मको मुहुर्तमा मुख्य कलाकार तथा प्राविधिकहरु उपस्थित थिए ।
मंगलबारबाट छायांकन सुरु हुने यो फिल्मलाई नायिका प्रियंका कार्की र नव कलाकार कमला घिमिरेले मुहुर्त सर्ट दिएका थिए । फिल्ममा प्रियंका र कमला आमाछोरीको भूमिकामा छन् ।
निर्देशक बलामीले सत्य घटनामा आधारित रहेर तयार पार्न लागेको यो फिल्ममा महिलाको पीडा देखाइने बताए । ‘दलित महिलाको श्रीमान नभएपछि समाजले ऊमाथि कस्तो दृष्टि लगाउछ ? उसका स–साना नाबालक छोरी हुर्काउन कति कठिन हुन्छ ? यहि समाज जातियताको आडमा कसरी प्रताडित गर्छ भन्ने कथा फिल्ममा देखाइनेछ’, निर्देशक बलामीले भने ।
मकवानपुरको वीरखर्ग, कुलेखानी, काठमाडौं र दुबईमा खिचिने फिल्ममा शंकर अधिकारी ‘घायल’को गीत, पटकथा र सम्बाद, राजेन्द्र बजगाइको संगीत, शिव ढकालको छायांकन, केवलमान सिंह बस्नेतको प्रोडक्सन, समीर मियाँको सम्पादन र रामजी राउतको मुख्य सहायक निर्देशन रहनेछ ।
रुना इन्टरटेन्ट्मेन्टको ब्यानरमा निर्माण हुन लागेको फिल्ममा प्रियंका कार्की, करिश्मा मानन्धर, शर्मिला मल्ल, कमला घिमिरे, सुष्मा लामा, अंशु महर्जन, कुसुम शर्मा, प्रिया रिजाल, गीता अधिकारी, सरिता भण्डारी, प्रितिका शर्मा, आश्मा पाण्डे र रेश्मा केसीको अभिनय रहनेछ ।
