फिल्म ‘तेल भिसा’को रिलिज मिती परिवर्तन भएको छ । फिल्मको आगामी भदौ २८ गते रिलिज गर्ने भनिएको थियो । तर, अब यो फिल्मा आगामी मंसिर ७ गते रिलिज हुने भएको हो ।
निर्माणपक्षले यो फिल्मको फस्टलुक पोस्टर सार्वजनिक गर्दै आगामी मंसिर ७ गते रिलिज गर्ने पक्का गरेको हो । सार्वजनिक फस्टलुकमा नायक विपिन कार्कीको दोहोरो भूमिका हेर्न सकिन्छ । साथमा, नायिका वर्षा राउत, पूजा चन्द, ऋचा शर्मा प्रस्तुत छन् ।
निर्देशक शंकर घिमिरेको निर्देशन रहेको यो फिल्मको अबको केही हप्तापछि दोस्रो चरणको छायांकन सुरु हुने निर्माणपक्षले जनाएको छ ।
यो फिल्ममा प्रिन्स युवराज कार्की र श्रुती दाहाल कार्यकारी निर्माता, सुशन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्वाजको संगीत, अजय खड्काको सम्पादन छ ।
अनिश पाण्डे र शिवराज कार्कीको लगानी रहेको यो फिल्ममा नायक विपिन कार्कीको अलावा वर्षा राउत, ऋचा घिमिरे, पूजा चन्द लगायतका कलाकारको अभिनय छ । फिल्ममा कलाकार बुद्धि तामाङको पनि मुख्य भूमिका छ ।
वेल्डन क्रियसनको ब्यानरमा ऋचा घिमिरेको प्रस्तुति रहेको यो फिल्मको पहिलो चरणको छायांकन अमेरिकामा गरिएको थियो भने दोस्रो चरणको छायांकन चितवनमा गरिने छ ।
