प्रदीप शाहीले निर्देशन र साइ प्रोडक्सन नेपालको ब्यानरमा निर्माण हुन लागेको चलचित्र ‘एक्लो’मा ञ्चारकर्मी तथा अभिनेताद्वय दिनेश डीसी र सुरजसिंह ठकुरी अनुबन्धित भएका छन् । केही दिन अगाडि औपचारिक कागजी सम्झौता गर्दै चलचित्र निर्माण टिमले डीसी र ठकुरी यो चलचित्रमा जोडीएको जनाएको हो ।
साइन्स-फिक्सन ‘एक्लो’ चलचित्र मार्फत यी दुइले लामोसमयपछि चलचित्रमा कमब्याक गर्न लागेका हुन् । यो चलचित्रले सन् २०३० मा महामारीका कारण मानिसले पृथ्वी ग्रह छोड्न बाध्य भएको काल्पनिक कथालाई पेश गर्नेछ । यो चलचित्रलाई निर्माणमा बेलायतको ह्याम्साएर एकाउन्टेनले सहकार्य गरेको छ ।
आगामी भदौदेखि छायांकन सुरु हुने यो चलचित्रमा अभिनेता प्रदीप खड्का, विजय लामा, सुनिल थापा, एवनराज उप्रेती, अभिनेत्री बेनिशा हमाल, कविता नेपाली, दीया पुन, बेलायती अभिनेता जेमी बेकन लगायतको अभिनय रहनेछ ।
निर्देशक शाहीले बेलायतमा चलचित्र मेकिङ पढेका हुन्। त्यहाँ केही छोटो चलचित्र र सिरिजमा काम गरेपछि उनी नेपाली चलचित्र निर्देशनमा होमिएका थिए। यसअघि उनले ‘गोर्खा: विनिथ द ब्रेभरी’ र ‘अन्तिम संस्कार’ निर्देशन गरेका थिए।
