गायक करण परियारले पाश्र्व गायनमा डेब्यूगरेका छन् । उनले ‘बुलाकी’ फिल्मको दुई वटा गीत रेकर्डिङ गरेर पाश्र्व गायनमा डेब्यू गरेका हुन् ।
आगामी साउनको ३२ गतेबाट पुनः रिलिजमा आउन लागेको यो फिल्मको एउटा गीतमा गायिका अनु चौधरीले साथ दिएकी छिन् । अर्को गीतमा गायिका समीक्षा अधिकारीले आवाज दिएकी छिन् । बाबुल गिरीको शब्द तथा संगीतमा यो दुबै गीत तयार भएको हो।
स्वर्गीय मोती विष्टको प्रस्तुति तथा टोपेन्द्र विष्टको निर्माणमा तयार भएको यो फिल्मलाई लक्ष्मण सुनारले निर्देशन गरेका हुन् । नेपाल र विदेशमा आयोजित विभिन्न महोत्सव, अवार्ड कार्यक्रममा यो फिल्मले पुरस्कार जित्दै आएको छ ।
यो फिल्ममा सुरक्षा पन्त, नरेन खड्का, विराज बिष्ट, सरस्वती खत्री, लक्ष्मी गिरी, सुशील पोखरेल, रमेश वुढाथोकी, कुलद्धिप अधिकारी, झलनाथ खत्री, उपासना नेम्वाङ लगायतका कलाकारको अभिनय छ ।
फिल्ममा शिव ढकालको छायांकन, अर्जुन जिसीको सम्पादन, राज बहादुर सानेको कथा तथा पटकथा छ । यो फिल्मलाई उपत्यकामा रिच इन्टरटेन्मेन्ट र मोफसलमा एफडी कम्पनीले वितरण गर्नेछन् ।
