भारतीय अभिनेता अल्लु अर्जुन अभिनित बहुप्रतिक्षित फिल्म ‘पुष्पा २’को नेपालमा पनि अग्रिम टिकट बुकिङ खुल्ला भएको छ । फिल्मको नेपाल बितरक आरआर फिल्मस्का रोहिट कट्टेलले सामाजिक सञ्जाल मार्फत फिल्मको अग्रिम बुकिङ खुल्ला भएको जानकारी दिएका हुन् ।
उनले लेखेका छन्, ‘वर्ष कै बहुप्रतिक्षित फिल्म ‘पुष्पा–२’ को नेपाल बुकिङ खुल्ला भएको छ । आफ्नो नजिकको सिनेमा घरमा सिट सुरक्षित गर्नुहोला ।’ फिल्मको बुकिङ खुल्ला भएपनि हलले शो भने राख्न बाँकी छ । आगामी डिसेम्बर ५ अर्थात बिहिबारबाट फिल्म प्रदर्शनमा आउँदैछ । फिल्मले भारतीय सेन्सर बोर्ड (सीबीएफसी)बाट यू/ए प्रमाणपत्र प्राप्त गरेको छ । फिल्म नेपालमा सेन्सर प्रक्रियामा छ ।
भारतीय सेन्सर सर्टिफिकेटले फिल्मको रनटाइम ३ घण्टा २० मिनेट र ३८ सेकेन्ड रहेको बताएको छ । जबकि पुष्पा फिल्मको पहिलो भागको रनटाइम २ घण्टा ५९ मिनेट थियो । सुकुमारको लेखन तथा निर्देशनमा बनेको यो फिल्मको बजेट ५ सय करोड रहेको बताइएको छ ।
यस एक्सन ड्रामामा अल्लु अर्जुनबाहेक रश्मिका मन्डन्ना र फहद फासिल मुख्य भूमिकामा छन् । जगदीश प्रताप बन्दरी, जगपति बाबु, प्रकाश राज, अनुसया भारद्वाज, राव रमेशलगायत कलाकारको पनि अभिनय छ ।
फिल्म तमिल, तेलुगु, हिन्दी, कन्नड, बंगाली र मलयालम भाषाहरूमा रिलिज हुन लागेको हो । यो पहिलो पान इन्डिया फिल्म हो, जुन बंगालीमा पनि रिलिज हुनेछ । फिल्म स्ट्यान्डर्ड, थ्रीडी, आइम्याक्स, फोरडीएक्स, डी–बक्स ढाँचामा रिलिज हुनेछ ।
