यही असार ७ गतेबाट रिलिज हुने तयारीमा रहेको चलचित्र ‘दान्भी’मार्फत मोडल कुन्साङ बोमजमले अभिनयमा ‘डेब्यू’ गर्दैछन् । उनको यो पहिलो चलचित्र भएकोले उनी यो चलचित्रबाट निकै आशावादी र उत्साहित छन् ।
‘सारांश’ पात्रमा देखिएका कुन्साङ आफ्नो चरित्रबारे त खुल्दैनन्, तर आफ्नो काम दर्शकले स्वीकार्नेमा ढुक्क छन् । उनी भन्छन्,’मेरो चाखलाग्दो चरित्र छ । तर अहिले भन्न मिल्दैन । यो चलचित्र हेरेपछि थाहा हुन्छ । मेरो चरित्र गम्भीरदेखि अलिक फरक मोडबाट बाँचेको किसिमको छ । चलचित्रमा अलिक गम्भीर र देशलाई माया गर्ने किसिमको मान्छे छु’।
स्कुल पढ्दादेखि नै नाटकका कलाकार र कराँतेका खेलाडी रहेका उनी भन्छन्, ‘मैले कक्षा ३ देखि ११ सम्म मार्सल आर्ट गरें । ११ पछि मार्सल आर्टको काम रोकियो । मार्सल आर्टले अहिलेसम्म निरन्तरता दिइरहेको भए ‘दान्भी’मा एक्सन गर्न सजिलो हुन्थ्यो । तर बीचमा ग्याप भएपछि यही चलचित्रका लागि मैले ६ महिना एक्सन प्राक्टिस गरें’।
म्युजिक भिडियोको आफ्नो रोमान्टिक छविलाई ‘दान्भी’ले परिवर्तन गर्नेमा उनी ढुक्क छन् । दर्शकले फरक एक्सन थाहा पाउन ‘दान्भी’ हेर्नुपर्ने दाबी गर्दै भन्छन्, ‘दर्शकले गीत, ट्रेलरमा मेरो लुक्स देखिसक्नुभएको छ । अझ म्युजिक भिडियोमा मेरा फ्यानले मेरो काम देखिसक्नुभएको छ । अब यो चलचित्र हेरिसकेपछि मेरो अभिनय क्षमता कस्तो रहेछ भनेर थाहा पाउनुहुनेछ ।’
उनी भन्छन्,’स्क्रिप्टमा आफ्नो चरित्रका कारण ‘दान्भी’मा जोडिएको हो। ‘सुरुदेखि अन्त्यसम्म मेरो जुन क्यारेक्टर गएको छ, त्यो फिलिङ, इमोसनमा आफूले काम देखाउन पाएको छु । दर्शकका लागि मेरो काम फेरी फरक लाग्न सक्छ,’ उनी भन्छन् ।
रुपेश तामाङ निर्देशित यो चलचित्रमा पुजा शर्मा, कुन्साङ बोमजम, किरण श्रेष्ठ, मोनासिला खतिवडा, राजाराम पौडेल, कालु रानालगायतका कलाकारको अभिनय छ ।
