जिग्री पाँडे टिमका तर्फबाट कुमार कट्टेलको लेखन तथा निर्देशन रहने फिल्म ‘लाज शरणम्’ निर्माणको औपचारिक घोषणा गरिएको छ । शुक्रबार काठमाडौंमा आयोजित पत्रकार सम्मेलनमा यो फिल्म निर्माणको घोषणा गरिएको हो ।
कमेडी जनरामा निर्माण हुने यो फिल्मलाई निर्देशक कुमारले सिंगो फिल्म नगरीको फिल्म भएको बताए । कार्यक्रममा कुमारको जन्मदिनको सेलिव्रेशन समेत गरिएको थियो । उनको जन्मदिनको अवसर पारेर यो फिल्मको औपचारिक घोषणा भएको हो ।
यही फिल्मबाट मुकुन्दले १२ बर्षपछि फिल्ममा फेरि काम गर्न लागेका हुन् । अन्य कलाकारहरुको बिषयमा विस्तारै जानकारी दिने निर्माणपक्षले बताएको छ ।
आगामी फागुनको १४ गतेबाट रिलिज गर्ने घोषणा गरिएको यो फिल्ममा नवीन श्रेष्ठ निर्माता र रमेश नरेश शाह सह–निर्माताको रुपमा छन् । सुदीप बरालको छायांकन रहने फिल्ममा अर्जुन घिमिरे, सागर लम्साल, कमलमणी नेपाल, माला लिम्बु, विजय बराल र मुकुन्द श्रेष्ठको मुख्य भूमिका छ ।
